Cayaartan oo aad loo wada sugayey isla markaana ay labada dalba ku tartamayeen sidii ay mid waliba midda kale guusha uga marooqsan lahayd ayaa waxaa ay xulka dalka Masar dib u habayn ku sameeyeen qaab cayaareedkoodii ay ku cayaarayeen cayaarihii hore inkastoo taasi aysan wax badab ka badalin oo ay xulka Gahana weerar badan ku qaadeen xulka Masar.

Cayaartan oo qaybteedii hore iyo inta badan qaybtii labaad aysan labada kooxood wax gool ah iska dhalin ayaa waxaa uu macalinka xulka Masar Xasan Shaxaata soo geliyey cayaarta cayaaryahanka hogaanka u hayey tartanka gooldhaliyayaasha koobkan una safta kooxda Aliskandariya ee Mohamed Geddo kaasoo ka dib markii uu kubad kow iyo laba ah oo uu la cayaaray weeraryahankaka kale ee Zidan ku hubiyey shabaqa xulka Ghana oo ayagu ka shalaayey fursadihii faraha badnaa oo ay heleen sidaasina ay cayaartii ku noqotay 1-0 ayadoo ay ka dhimanayd muddo 5 daqiiqadood ah.

Xulka Ghana ayaa ku guuldaraystay in ay iska soo gudaan goolkaasi isla markaana cayaarta u diraan waqti dheeri ah sidaasina ay xulka dalka Masar ku noqdeen horyaalka qaramada qaaradda Afrika markii todobaad taasoo xalay meel kasta oo ay reer Masar ku nool yihiin gaar ahaan magaalooyinka waawayn ee dalkaasi looga dareemayey damaashaadka taageerayaasha dalka Masar.

Xulka Masar ayaa inkastoo uusan ka qaybgalaynin tartanka koobka adduunka hadana waxa uu dhulka ku soo jiiday afar dal oo ka mid ah kuwa qaaradda u matalaya koobka adduunka oo kala ah Cameroon, Algeria, Nigeria iyo Ghana.